Fakhra batool

by ♥мαηмσηι♥ 1/9/2010, 00:44

ہدیہ بحضور سرورِ کونین سیدنا محمدۖ

جس کو بھی اسمِ محمدۖ کا نگینہ مل گیا
یوں سمجھ لو سارے عالم کا خزینہ مل گیا

مشکلوں میں آپۖ کو جس نے پکارا یا نبی
یوں لگا گرداب میں اس کو سفینہ مل گیا

آبِ کوثر کی، سوا توقیر اُس دم ہو گئی
جس گھڑی اُس میں محمدۖ کا پسینہ مل گیا

محمدۖ کی چوکھٹ پہ سر اپنا جھکایا تو لگا
ہم کو جنت کی طرف اِک اور زینہ مل گیا

جب خیالوں میں ترے روضے کی جالی چوم لی
یوں لگا، ہم کو تو گھر بیٹھے مدینہ مل گیا

بدر کے میداں سے لے کے کربلا کے باب تک
ہم کو جینے اور مرنے کا قرینہ مل گیا

ناز کیوں اپنے مقدر پر نہ ہو ہم کو بتول
پھر گناہوں کی تلافی کا مہینہ مل گیا

فاخرہ بتول

by ♥мαηмσηι♥ 1/9/2010, 00:44

محبتوں کا خیال رکھنا

محبتوں کا خیال رکھنا
کہیں نہ ایسا ہو بے دھیانی میں
تم ہتھیلی کو کھول ڈالو
ہوائیں سازش پہ آن اُتریں
تو خشک پتوں سا حال ہو گا
گلاب رُت کا زوال ہو گا
محبتوں کا خیال رکھنا

فاخرہ بتول

by ♥мαηмσηι♥ 1/9/2010, 00:45

محبت حادثہ ہے

محبت حادثہ ہے
حادثے سے بچ نکلنے کی
کوئی تدبیر کر لو، اس سے پہلے کہ خواب ہو جاؤ
جسے ہم حادثہ کہتے ہیں
جیون کو گھڑی بھر میں
مِٹا کر خاک کرتا ہے
کوئی الزام دھرتا ہے
کبھی معذوریوں کے جال میں قیدی
بنا کر چھوڑ دیتا ہے
یہ بندھن توڑ دیتا ہے
محبت حادثہ ہے
حادثے سے بچ نکلنے کی کوئی تدبیر کر لو
اس سے پہلے خواب ہو جاؤ

فاخرہ بتول

by ♥мαηмσηι♥ 1/9/2010, 00:45

بُھول جانے کا تو بس ایک بہانہ ہو گا
کہ بہرطور اسے یاد تو آنا ہو گا

کوئی موسم ہو، مہکتا رہے شاداب رہے
اپنی آنکھوں کو کنول ایسا بنانا ہو گا

بند مُٹھی سے جو اڑ جاتی ہے قسمت کی پری
اس ہتھیلی میں کوئی چھید پرانا ہو گا

آبلے پاؤں کے مہکیں تو مگر درد نہ دیں
دشت میں ریت کے ذروں کو بتانا ہو گا

زاویے اس کی نگاہوں کے بڑے قاتل ہیں
سامنے اس کے بہت سوچ کے جانا ہو گا

گھاؤ کتنا بھی پرانا ہو، بہرحال اسے
کچّے موسم کی شرارت سے بچانا ہو گا

ہاتھ لکھنے پہ مصر، خوف زمانے کا بتول
پیڑ پر نام کوئی لکھ کے مٹانا ہو گا

فاخرہ بتول

by ♥мαηмσηι♥ 1/9/2010, 00:46

وصال چُپ چاپ مر گیا ہے، اُسے نہ ڈھونڈو
فراق دل میں اُتر گیا ہے، اُسے نہ ڈھونڈو

وہ منزلوں کا پتہ ، ٹھکانہ بُھلا چکا تھا
جو راستے میں بچھڑ گیا ہے، اُسے نہ ڈھونڈو

عبث لکیروں کے جال میں ڈھونڈتے ہو اس کو
نصیب پھر ہاتھ کر گیا ہے، اُسے نہ ڈھونڈو

کہا تھا اس پر یقین تم مت بحال کرنا
وہ بات سے پھر مُکر گیا ہے، اُسے نہ ڈھونڈو

بتول اس کا بھی حال دل کی طرح ہوا ہے
جو ابر سورج کے گھر گیا ہے، اُسے نہ ڈھونڈو

فاخرہ بتول

by ♥мαηмσηι♥ 1/9/2010, 00:47

خاک میں گُزرا ہوا کل نہیں ڈھونڈا کرتے
وہ جو پلکوں سے گِرا پل نہیں ڈھونڈا کرتے

پہلے کچھ رنگ لبوں کو بھی دِئیے جاتے ہیں
یُونہی آنکھوں میں تو کاجل نہیں ڈھونڈا کرتے

جس نے کرنا ہو سوال آپ چلا آتا ہے
لوگ جا جا کے تو سائل نہیں ڈھونڈا کرتے

یہ ہیں خاموش اگر، اس کو غنیمت جانو
یونہی جذبات میں ہلچل نہیں ڈھونڈا کرتے

پیچھے کھائی ہے تو آگے ہو سمندر گہرا
مسئلہ ایسا ہو تو پھر حل نہیں ڈھونڈا کرتے

اِن کُھلی آنکھوں سے خوابوں کو تلاشو نہ بتول
پلکیں ہو جائیں جو بوجھل نہیں ڈھونڈا کرتے

فاخرہ بتول

by ♥мαηмσηι♥ 1/9/2010, 00:47

درد سینے میں بہت شور بپا کرتا ہے
ایک سنّاٹا سا چہرے پہ صدا کرتا ہے

بے خبر اُس سے اگر ہم ہیں تو بتلائے زرا
پھر اُسے کون افق پر سے تکا کرتا ہے

راہ پُر شوق ہے، دھیان رہے اس پہ مگر
جو چلا، آبلے پیروں کے گِنا کرتا ہے

موج چنچل سہی، خود سر ہے کنارہ لیکن
مل کے رہتے ہیں اگر وقت جدا کرتا ہے

کب بھرا کرتی ہے قسمت کوئی دامن، ہر شخص
تھال سے اُس کے گوہر آپ چُنا کرتا ہے

اپنی مُٹھی میں چمکتا ہوا جگنو رکھ لو
کہ بھلا چاند، فلک پر ہی لگا کرتا ہے

اوّلیں نقشِ محبت بھی عجب شے ہے بتول
آخری سانس تلک ہم سے وفا کرتا ہے

فاخرہ بتول

by ♥мαηмσηι♥ 1/9/2010, 00:48

سُورج سے جنگ کرنے کی، بادل نے ٹھان لی
کہتے ہیں اس جنوں ہی نے پھر اُس کی جان لی

پھر عہد ہم سے کر کے، نبھایا کسی کےساتھ
اِک بار پھر سے ہم نے مقدر کی مان لی

صحرا میں چاروں اور نہ چھاؤں ملی ہمیں
تب تھک کے ہم نے دُھوپ کی چادر ہی تان لی

قُدرت کی بانٹ ہوتی ہے کتنی عجیب سی
دل کو ملے ہیں تیر، کسی نے کمان لی

اس نے پلٹ کےدیکھا ہے جاتے ہوئے بتول
لگتا ہے زندگی نے اچُھوتی اُٹھان لی

فاخرہ بتول

by ♥мαηмσηι♥ 1/9/2010, 00:48

انا اک ناؤ ہے

انا وہ ناؤ ہے
جس کا مسافر صرف موجوں کے
جلو میں زندگی اپنی
بیتا دیتا ہے کچھ ایسے، نہیں اس کو خبر ہوتی
کہ چاروں سمت پانی میں
لگائے گھات بیٹھا ہے
بڑا گمبھیر سنٌاٹا

by ♥мαηмσηι♥ 1/9/2010, 00:49

ستم گر

زہر میں ڈوبی نوکوں والے
تیر چلائے سارے اس نے تاریکی میں
لیکن اس کو خوب خبر تھی
گھور اندھیری سب راہوں میں
میں نے آنکھیں رکھ چھوڑی ہیں

by ♥мαηмσηι♥ 1/9/2010, 00:49

منافق

کہا اس نے کہ شاخوں سے
جدا پھولوں کو کرنے کی
ہواؤں کی جو سازش ہے، اسے اچھی نہیں لگتی
فقط اک پل کو جی چاہا
اسے اتنا تو کہہ دوں آج
محبت پھول کی ان پتیوں سے بڑھ کے نازک تھی
جسے قدموں تلے اس نے
کبھی کا روند ڈالا ہے

by ♥мαηмσηι♥ 1/9/2010, 00:50

میں کیا تھی۔ ۔ ۔ ۔ ۔ ۔ ۔؟

اس نے کہا
تم بہت منفرد، بہت خاص، لڑکی ہو
اور میں نے کہکشاں قدموں تلے روند ڈالی
اس نے کہا
تم بہت عام سی لڑکی ہو
اور میں نے چپکے سے مٹی اوڑھ لی

by ♥мαηмσηι♥ 1/9/2010, 00:50

لاکھ چاہیں ہم مقٌدر کو بدل سکتے نہیں
اس میں لکھے فیصلے ایسے ہیں،ٹل سکتے نہیں

اپنی اپنی مصلحت کے دائروں سے بارہا
ہم نکلنا چاہتے تو ہیں، نکل سکتے نہیں

زندگی بھر ساتھ دینے کا وہ کر کے فیصلہ
آج دو اک گام اپنے ساتھ چل سکتے نہیں

دل سے اٹھی ٹیس ان کو بعد مدت دیکھ کر
کس قدر تھا مان جذبوں پر،مچل سکتے نہیں

سوچ کر رکھنا قدم،آسیب کوئی ہے ضرور
اس ڈگر پر جان و دل اکثر سنبھل سکتے نہیں

زندگی کے خواب کو دیکھے بنا چارہ نہیں!!
خواب اندر خواب میں،آنکھیں تو مل سکتے نہیں

by ♥мαηмσηι♥ 1/9/2010, 00:51

دھڑکن کو تیری یاد سے تحریک مل رہی ہے
چاہت اگر سزا ہے، ہمیں ٹھیک مل رہی ہے

اس در سے جو بھی لوٹ کے آیا تو رو پڑا وہ
لگتا ہے آنسووں کی وہاں بھیک مل رہی ہے

ہم نے تو پل صراط کے بارے میں سن رکھا تھا
ہر راہ ، بال سے ہمیں باریک مل رہی ہے

شاید کسی بھی لمحے مقابل ہوں اس کی گلیاں
جو دور کی صدا تھی وہ نزدیک مل رہی ہے

جو جگمگا اٹھی تھی تجھے دیکھ کر خوشی سے
مدت سے راہ وہ ہمیں تاریک مل رہی ہے

by ♥мαηмσηι♥ 1/9/2010, 13:34

وچھوڑا آپ روتا ھے

تعلق توڑنے والے تو شاید بھول جاتے ھیں
کہ آنے والی ھر رت سے،
گلے ملتے ھیں وہ تنہا،
مگر تنہا نہیں روتے
بہت بیکل،بہت مغموم اور بے تاب ھوتا ھے
وچھوڑا آپ روتا ھے

by ♥мαηмσηι♥ 1/9/2010, 13:35

اسی کو "وصل" کہتے ھیں

کوئی کچھ بھی کہے لیکن

مرے نزدیک تو بس اس کا مطلب مختصر سا ھے

کہ اک بپھرا ھوا ساگر ھے"فرقت" جس کو کہتے ھیں

اسی ساگر میں اک چھوٹی سی نازک سی،
ابھرتی، ڈوبتی، موجوں سے لڑتی ھوئی ناؤ ھوتی ھے

اسی کو "وصل" کہتے ھیں

by ♥мαηмσηι♥ 1/9/2010, 13:36

جھوٹا

وہ کہتا تھا
ہتھیلی پر خزان رت میں
مرا جب نام لکھو گے
تو تم خوشبو کی صورت میں
مجھے نزدیک پاؤ گے
اسے شاید خبر ہوگی
خزاں رت میں ہتھیلی پر
ہمیشہ خار اگتے ہیں

by ♥мαηмσηι♥ 1/9/2010, 13:37

پھر سے پیار کا دھوکہ کھایا جاسکتا تھا
دل کا کیا ھے ، دل بہلایا جا سکتا تھا

کیوں واپس نہ آیا جا کر وہ جانے
لیکن اس کے پاس تو جایا جا سکتا تھا

گر نہ ھوتا موم کی صورت دل اپنا
غم کے سورج سے ٹکرایا جاسکتا تھا

ایک تمھارا ساتھ اگر مل جاتا تو
ساری دنیا کو ٹھکرایا جا سکتا تھا

لوگوں نے مجرم ٹھہرایا ، مان لیا
آخر کس کس کو سمجھایا جاسکتا تھا

لے ڈوبا جب آنکھوں کو طوفان بتول
کیسے دل کا شہر بچایا جاسکتا تھا

by ♥мαηмσηι♥ 1/9/2010, 13:37

تمہیں پانے، اپنا بنانے کی خواھش بالکل ایسے ہی تھی

جیسے موسم _ خزاں میں گلابوں کی تمنا کرنا

کاغذ کے پھولوں کا مہکنا

صحرا سے پانی طلب کرنا

پتھر سے حال_ دل کہنا

اھل_ زر کے دلوں میں جذبہء محبت پنپنا

رگوں میں خون کی جگہ پارہ دوڑنا،

آج کے دور میں سچ بولنا،

یا پھر کسی بھی دور میں ،

کسی بھی مرد کا اپنی کمٹمنٹ کو پورا کرنا

by ♥мαηмσηι♥ 1/9/2010, 13:39

"مجھے اک بات کہنی ہے"

جو تم ہوتے ہو مجھ سے دور

اداسی کی سیہ چادر

نہ جانے کس طرح، کیونکر

میرے سر پر

کہیں سے آن گرتی ہے

by ♥мαηмσηι♥ 1/9/2010, 13:40

"تمہارا لہجہ بدل رہا ہے"

وہی ہے دھرتی، فلک وہی ہے
یہ دل سمندر، بھنور سے نیناں
یقیں وہی ہے، گماں وہی ہے
یہ چاند اور کہکشاں وہی ہے
تمہاری صورت، تمہاری مورت
تمہاری باتیں وہی ہیں لیکن
بہت دنوں سے یوں لگ رہا ہے
سماعتوں میں اتر کے سورج پگھل رہا ہے

تمہارا لہجہ بدل رہا ہے

by ♥мαηмσηι♥ 1/9/2010, 13:41

خواب آنکھوں کو جگاتے تو کوئی بات بھی تھی
دل میں ہلچل سی مچاتے تو کوئی بات بھی تھی

مانا ہم سے تو کوئی بات بنائے نہ بنے!!
آپ ہی بات بناتے تو کوئی بات بھی تھی

چھوڑ کر جانے کی یہ ریت پرانی ہے بہت
آپ آ کر نہیں جاتے تو کوئی بات بھی تھی

آج ٹوٹا ہے یقیں، بھیگ گئی ہیں پلکیں!
ہم جو خوش ہوکے دکھاتے تو کوئی بات بھی تھی

وعدہء وصل تو دستور پرانا ٹھہرا !!
لوگ اس کو جو نبھاتےتو کوئی بات بھی تھی

by **Noman Ali** 1/9/2010, 15:49

Very Nice and Beautifull Sharing
All Sharing is zabardast
Beautifull
Hamesha Khush Rahain

by ♥мαηмσηι♥ 2/9/2010, 09:29

thnx jee
aap v hmsha khush raho .. Ameen

by Sponsored content

Fakhra batool

Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool

Re: Fakhra batool